ភ្នំពេញ៖ គណៈកម្មាធិការប្រឡងថ្នាក់ជាតិសម្រាប់ការបណ្តុះបណ្តាលក្នុងវិស័យសុខាភិបាល បានប្រកាសរកឃើញករណីបេក្ខជនចំនួន ៤នាក់ដែលបន្លំអត្តសញ្ញាណបណ្ណដើម្បីប្រឡងជំនួសបេក្ខជនដទៃក្នុងការប្រឡងថ្នាក់ជាតិជ្រើសរើសនិស្សិតចូលរៀនថ្នាក់ឆ្នាំសិក្សាមូលដ្ឋាននៅតាមគ្រឹះស្ថានបណ្តុះបណ្តាលក្នុងវិស័យសុខាភិបាលកាលពីថ្ងៃទី១៧ ខែកុម្ភៈ ឆ្នាំ២០២៤។

គណៈកម្មាធិការប្រឡងថ្នាក់ជាតិនឹងមានវិធានការតាមផ្លូវច្បាប់ចំពោះករណីបេក្ខជនដែលបន្លំខ្លួនប្រឡងជំនួសបេក្ខជនដទៃទាំង ៤រូបនោះ រួមទាំងបុគ្គលសមគំនិតដោយមិនមានការអត់ឱនឡើយ។

គណៈកម្មាធិការប្រឡងថ្នាក់ជាតិអំពាវនាវដល់បុគ្គលដែលកំពុងប្រព្រឹត្តនូវអំពើខុសច្បាប់នេះ សុំដកខ្លួនចេញពីការប្រឡងជាបន្ទាន់ ក្នុងករណីគណៈកម្មាធិការប្រឡងថ្នាក់ជាតិរកឃើញ នឹងបន្តស្នើចាត់វិធានការតាមផ្លូវច្បាប់ជាបន្តទៀត។

កន្លងមកគណៈកម្មាធិការប្រឡងថ្នាក់ជាតិក៏បានរកឃើញនិស្សិតក្លែងបន្លំសញ្ញាបត្រមធ្យមសិក្សាទុតិយភូមិ ហើយក៏ត្រូវបានលុបឈ្មោះចោលចេញពីបញ្ជីឈ្មោះនិស្សិតប្រឡងជ្រើសរើសជាប់ចូលរៀន នៅតាមគ្រឹះស្ថានបណ្តុះបណ្តាលវិស័យសុខាភិបាលនានាជាបន្តបន្ទាប់ផងដែរ។

យោងតាមបញ្ញត្តិមាត្រា៦២៩ នៃក្រមព្រហ្មទណ្ឌ ស្តីពីបទក្លែងបន្លំឯកសារសាធារណៈ ចែងថា ការក្លែងបន្លំប្រព្រឹត្តនៅក្នុងលិខិតយថាភូត ឬក្លែងបន្លំប្រព្រឹត្តនៅក្នុងឯកសារដែលចេញឱ្យដោយរាជការសាធារណៈដើម្បីធ្វើការកត់សម្គាល់សិទ្ធិអត្តសញ្ញាណ ឬឋានៈ ឬដើម្បីយល់ព្រមផ្តល់ការអនុញ្ញាត ត្រូវផ្តន្ទាទោសដាក់ពន្ធនាគារពី៥ឆ្នាំ ទៅ១០ឆ្នាំ៕